Nesër në Kosovë paradite do të kemi intervale kohore me diell dhe do të jetë nxehtë si pasojë e ajrit të nxehtë parafrontal. Pasdite apo në mbrëmje do të kemi depërtimin e frontit të fuqishëm të ftohtë ajror i cili do të sjellë reshje kalimtare shiu dhe bore, erëra të fuqishme veriore dhe zbritje të theksuara të temperaturave.
Në Shqipëri dhe Maqedoni nesër mot i ndryshueshëm por pa reshje kurse gjatë natës edhe në këto rajone do të kemi depërtimin e frontit të ftohtë ajror nga veriu. Në Maqedoni ka gjasa për reshje shiu kurse në Shqipëri do të mbetet kryesisht thatë.
Të enjtën do të kemi rritjen e menjëhershme të presionit atmosferik që si pasojë do të ketë kthjellim të motit por do të mbetet mjaft ftohtë. Gjatë ditës erërat do të qetësohen dhe do të ketë stabilizim të motit.
Nga e premtja në motin në rajonin tonë do të fillojë të ndikojë ajri i nxehtë nga Afrika Veriore. Erërat do të ndryshojnë drejtim dhe do të fryjnë nga jugperëndimi dhe jugu të cilat herë pas here pritet të jenë mjaft të fuqishme. Në Francën juglindore do të krijohet një ciklon jashtëzakonisht i fuqishëm i cili do të sjellë reshje të fuqishme shiu në Evropën Perëndimore kurse me depërtimin e ciklonit në Mesdhe dhe Italinë Veriore reshje të fuqishme ditëve të ardhshme priten në tërë bregdetin Adriatik. Reshje të fuqishme shiu priten në Slloveni, Kroaci, Bosnjë dhe Hercegovinë, Mal të Zi dhe ndoshta edhe në Shqipërinë veriperëndimore, veriore dhe bregdetare.
Detaje të reja për këto zhvillime ditëve të ardhshme në Meteoballkan.
