Të Premten në Kosovë pritet të mbajë mot me vranësira dhe riga lokale shiu të intensitetit kryesisht të dobët. Reshje paksa më intensive orëve të pasdites dhe mbrëmjes priten në jug dhe lindje të vendit. Në viset e larta malore do të ketë reshje bore. Temperatura maksimale deri në 14 apo 15 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi të Premten pritet të mbajë mot me vranësira e intervale kohore me diell. Vende-vende priten riga lokale shiu e në Shqipëri rrebeshe lokale me ndonjë vetëtimë dhe bubullimë orëve të pasdites.
Të Shtunën na pret mot me më shumë intervale kohore me diell dhe me rritje të temperaturave, por vranësirat të herëpashershme mbesin ende aktive me mundësi për ndonjë reshje të izoluar shiu.
Fronti i fuqishëm i ftohtë pasohet nga temperatura polare direkt nga veriu
Të dielën vjen fronti i ftohtë ajror me reshje shiu e bore. Fronti do të jetë i fuqishëm dhe i pasur me reshje, ndërsa pas frontit depërton ajri mjaft i ftohtë polar me erëra nganjëherë të fuqishme dhe të ftohta kryesisht nga veriu. Në Kosovë priten reshje shiu të cilat shumë shpejtë do të shndërrohen në borë. Priten edhe shtresa bore sidomos në zonat kodrinore-malore, por shtresa mund të ketë edhe në zonat e ulëta.
Mot mjaft i ftohtë na pret gjatë fillimit të javës së re, me vranësira e intervale kohore me diell. Temperaturat mbesin mjaft të ulëta dhe ka potencial për acar. Reshjet do të jenë të pakta dhe sporadike. Acari (fuqia e saktë apo impakti) do të varet nga kthjellimet eventuale dhe erërat gjatë orëve të natës dhe mëngjesit të hershëm. Do të jenë dy ose tri netë dhe mëngjese mjaft të ndjeshme dhe potencialisht të “rrezikshme” sidomos për pemëtarinë dhe kulturat tjera të hershme pranverore. Të shpresojmë që dëmtimet të jenë sa më të pakta./MeteoBallkan
