Nesër në Kosovë pritet të kemi mot të paqëndrueshëm, me vranësira, intervale kohore me diell dhe riga lokale shiu. Vende-vende priten edhe rrebeshe lokale me ndonjë vetëtimë dhe bubullimë. Do të jetë freskët me temperatura maksimale deri në 17 gradë Celsius.
Në Shqipëri, Maqedoninë Veriore, Mal të Zi dhe Kosovën lindore nesër pritet të mbajë mot me vranësira, intervale kohore me diell dhe riga lokale shiu. Pasdite do të ketë zhvillime konvektive që lokalisht do të kushtëzojnë rrebeshe shiu me vetëtima dhe bubullimë. Reshjet pranverore dhe verore në të shumtën e rasteve janë të karakterit lokal, pra përderisa një rajon goditet nga një rrebesh shiu, rajoni tjetër jo aq larg mund të ketë vetëm ndonjë rigë ose asnjë pikë shiu.
Të premtën përmirësim i motit, megjithatë në Kosovë priten vranësira dhe në disa vise riga kryesisht të dobëta shiu. Reshjet do të jenë afatshkurtra. Në përgjithësi moti do të ketë tendencë stabilizimi gradual.
Për fundjavë më ngrohtë, me intervale të gjata kohore me diell dhe vranësira lokale./METEOBALLKAN
