Nesër në Kosovë pritet të mbajë mot kryesisht i vranët dhe me reshje të herëpashershme, lokale shiu. Temperaturat do të vazhdojnë të jenë të larta për këtë periudhë kohore duke mos lejuar që reshjet e borës që kanë bllokuar rajonin të vijnë në viset tona dhe kjo për arsye të riaktivizimit të erërave juglindore që sjellin ajrin e ngrohtë mesdhetar.
Temperaturat pritet të luhaten nga 0 minimalja deri në 10 gradë Celsius ajo maksimale.
Reshje më intensive priten në Dukagjin, sidomos në veriperëndim të vendit.
Në Shqipëri, Maqedoninë e Veriut, Luginë të Preshevës dhe Mal të Zi e hëna sjellë mot me vranësira dhe reshje të shpeshta lokale shiu. Në Maqedoninë Veriore shumë më pak reshje, kurse në pjesë të Shqipërisë më shumë sidomos në veri, ndërsa në mbrëmje edhe në perëndim dhe në jug. Reshjet më të dendura të shiut priten në Mal të Zi, kurse borë vetëm në malet më të larta. Shumë pak reshje në Luginë dhe lindje e verilindje të Kosovës.
E Marta sjellë vranësira, mundësi për intervale kohore me diell dhe reshje lokale shiu. Temperaturat do të shënojnë rritje të mëtutjeshme dhe maksimalja në Kosovë mund të shkojë deri në 15 gradë Celsius. Nga mesnata ulje e ndjeshme e temperaturave dhe në veri dhe verilindje mund të ketë reshje të shiut të ngrirë apo shqotë.
Reshje lokal shiu të martën priten edhe në Shqipëri ku lokalisht do të ketë rrebeshe me vetëtima dhe bubullimë, por priten periudha të gjata pa reshje po ashtu. Gjatë natës në veri të Malit të Zi do të fillojnë reshje të dendura bore.
Të mërkurën pritet të kemi intensifikim të reshjeve sepse qendra ciklonike kalon mbi trojet tona. Temperaturat do të shënojnë ulje, ndërsa në pjesë të Kosovës mund të kemi reshje të përziera. Në Shqipëri priten rrebeshe intensive. Bora do të vazhdojë në veri të Malit të Zi dhe nga kufiri me Serbinë e tutje deri në Slloveni ku pritet të ketë reshje të reja të dendura bore dhe minuse të thella.
Sistemi i ajrit të ftohtë i stacionuar për ditë të tëra në Ballkan me dimër të madh dhe të vërtetë duke mos kapur viset tona do fillojë të lëvizë gradualisht në drejtim të Kosovës me reshje shiu e pastaj edhe bore, por nuk priten reshje të mëdha sepse lagështia e ciklonit do të “shpenzohet” derisa ajri i ftohtë të përfshijë viset tona. Të paktën kështu thonë parashikimet reale nga tani.
Reshje bore të Enjten përpos Kosovës priten edhe në veri të Shqipërisë, lindje, juglindje si dhe në perëndim, jugperëndim dhe veriperëndim të Maqedonisë së Veriut./MeteoBallkan
