Nesër në Kosovë do të mbajë mot kryesisht i vranët. Paradite mund të ketë ndonjë interval kohor me diell. Gjatë ditës vranët dhe me reshje lokale shiu, më intensive në perëndim-veriperëndim të vendit. Do të ketë edhe erëra herë pas here në disa rajone të fuqishme.
Në Shqipëri nesër pritet të mbajë mot mjaft i paqëndrueshëm, me vranësira dhe reshje shiu. Vende-vende priten përsëri rrebeshe lokale intensive shiu me vetëtima dhe bubullimë.
Të mërkurën do të vazhdojë të jetë ngrohtë për këtë periudhë kohore. Do të ketë edhe intervale kohore me diell, megjithatë vende-vende priten reshje shiu dhe erëra herë pas here të fuqishme jugore, juglindore dhe jugperëndimore në disa rajone.
Të enjten me reshje shiu në tërë rajonin. Pasdite erëra do të ndryshojnë drejtim dhe do të fillojnë të fryjnë nga veriu dhe veriperëndimi. Këto erëra do të lajmërojnë uljet e theksuara të temperaturave si dhe shiu do të shndërrohet në borë por nuk do të zgjatë shumë. Të premten ftohtë dhe thatë me erëra të acarta veriore dhe veriperëndimore, por edhe me intervale kohore me diell.
Sipas ecurive aktuale gjatë fundjavës pritet depërtimi i një cikloni nga jugu i Italisë i cili do të kushtëzojë reshje bore në shumicën e territorit të Shqipërisë dhe Maqedonisë së Veriut. Reshje bore priten edhe në disa vise në Kosovë, por më shumë në Shqipëri dhe Maqedoninë Veriore. Temperaturat do të vazhdojnë të pësojnë ulje të theksuar si në vlerat minimale po ashtu edhe në ato maksimale./Meteoballkan