Nesër në Kosovë pritet të kemi përmirësim të motit. Në mëngjes nëpër disa lugina mund të ketë mjegull afatshkurtër, ndërsa gjatë ditës na pret mot kryesisht me diell dhe me vranësira të pakta lokale. Pasdite mund të ketë ndonjë zhvillim krejtësisht të izoluar. Temperaturat maksimale pritet të lëvizin nga 27 deri në 30 gradë Celsius.
Në Shqipëri dhe rajon nesër pritet të mbajë mot me intervale të gjata kohore me diell dhe vranësira lokale të herëpashershme. Rrallë në ndonjë rajon mund të ketë ndonjë rigë ose rrebesh të izoluar shiu.Temperaturat shënojnë rritje.
Të martën pak më nxehtë, por pasdite priten zhvillime konvektive të vranësirave të cilat pritet të kushtëzojnë rrebeshe të izoluara shiu me vetëtima dhe bubullimë. Rrebeshet nuk pritet të zgjasin shumë, por mund të jenë të fuqishme në disa rajone.
Nga e mërkura na pret mot kryesisht me diell dhe me vapë verore. Temperaturat maksimale të enjtën dhe të premtën mund të arrijnë deri në 36-37 gradë Celsius./MeteoBallkan
