Presioni i ajrit ka filluar të ngritet dukshëm dhe kjo është shenjë se po hymë nën ndikimin e masave ajrore të thata anticiklonike, megjithatë gjatë natës priten reshje bore vende-vende në Kosovë, Shqipërinë lindore dhe Maqedoni.
Nesër në Kosovë do të mbajë mot me vranësira dhe reshje të dobëta lokale bore. Ka mundësi që të ketë edhe intervale kohore me diell, por do të jetë mjaft ftohtë për shkak të erërave të ftohta veriore.
Edhe në Shqipëri, Maqedoni dhe Mal të Zi nesër pritet të mbajë mot mjaft i ftohtë me përjashtim të viseve bregdetare. Reshje atmosferike nesër nuk pritet të ketë.
Anticikloni i fuqishëm me qendër në Evropë do të vazhdojë të mbajë ndikimin e tij edhe ditëve të ardhshme mbi rajonin tonë, duke kushtëzuar mot kryesisht të thatë, me netë mjaft të ftohta, por me ditë relativisht të ftohta. Nga e Enjta pritet ngritje graduale e temperaturave. Nëpër lugina do të ketë mjegull ditëve të ardhshme dhe aty ku mbretëron mjegulla do të jetë më ftohtë. Sipas ecurive aktuale sinoptike natën e fundit të këtij viti mund të kemi ndryshim të situatës sinoptike. Do të kemi dobësimin e Anticiklonit Evropian, gjegjësisht largimin e tij në drejtim të Oqeanit Atlantik, kurse në drejtim të rajonit tonë do të fillojnë të depërtojnë masa jostabile ajrore nga lindja e Kontinentit. Kjo mund të rezultojë me reshje të dendura bore nga nata e fundit të këtij viti apo nga fillimi i Vitit të Ri./Meteoballkan.
