Nesër në Kosovë na pret mot i ndryshueshëm. Paradite me diell, ndërsa pasdite pritet të ketë shtim të vranësirave të cilat do të kushtëzojnë riga lokale shiu kryesisht të dobëta dhe reshje lokale bore po ashtu të intensitetit të dobët. Temperaturat maksimale pritet të arrijë deri në 8 gradë Celsius, kurse pasdite dhe në mbrëmje ulje e temperaturave për shkak të frontit të dobët të ftohtë ajror i cili pritet të kushtëzojë erëra nga veriu dhe veriperëndimi.
Në Shqipëri dhe Maqedoninë Veriore nesër pritet të mbajë mot i ndryshueshëm. Pas një paraditeje me intervale kohore me diell, gjatë ditës dhe pasdite do të ketë shtim të vranësirave të cilat do të kushtëzojnë reshje lokale shiu dhe bore. Reshje pak më intensive bore priten në lindje dhe juglindje të Shqipërisë dhe perëndim të Maqedonisë së Veriut gjatë orëve të mbrëmjes. Në juglindje të Shqipërisë priten reshje të dendura bore afërsisht rreth orëve të mesnatës.
Mot me reshje kalimtare dhe afatshkurtra bore nesër pasdite pritet edhe në Mal të Zi dhe Luginën e Preshevës.
Të shtunën pritet të kemi mot pak më të ftohtë, me intervale kohore me diell dhe vranësira të cilat më të theksuara pritet të jenë në Kosovë duke kushtëzuar fjolla sporadike bore.
Të dielën dhe të hënën na pret mot më stabil dhe me rritje të ndjeshme të temperaturave ditore. Të martën përsëri ndryshim i motit, ulje e temperaturave dhe priten edhe reshje bore, vende-vende intensive, por që nuk pritet të zgjasin shumë./Meteoballkan
