Sot në Kosovë do të mbajë mot i vranët dhe me fjolla dëbore, veçanërisht gjatë orëve të mëngjesit priten reshje lokale bore në shumë pjesë të Republikës së Kosovës, ndërsa gjatë orëve të pasdites do të mbajë mot i vranët, i ftohtë dhe me ndonjë fjollë sporadike bore.
Në Shqipëri dhe Maqedoninë Veriore pritet të mbajë mot i vranët dhe me reshje lokale shiu të intensitetit kryesisht të dobët. Në viset kodrinore-malore priten reshje të dobëta bore. Edhe në Mal të Zi nesër pritet të mbajë mot kryesisht i vranët dhe me fjolla lokale dëbore.
Nesër në Kosovë do të vazhdojë të mbajë mot i vranët. Pasdite do të kemi depërtimin e një fronti të ftohtë nga veriperëndimi i Kontinentit. Ky front do të sjellë reshje shiu të cilat shumë shpejt do të shndërrohen në reshje bore. Në momentin e kalimit të frontit vende-vende priten reshje të dendura bore, por të cilat nuk do të zgjasin shumë.
Reshje lokale shiu e bore të mërkurën pasdite do të përfshijnë edhe shumë pjesë të Shqipërisë dhe Maqedonisë së Veriut. Po ashtu edhe në Mal të Zi të mërkurën priten reshje kalimtare bore.
Të enjten pas një stabilizimi shumë afatshkurtër të motit gjatë ditës do të kemi depërtimin e një fronti të ri të ftohtë ajror i cili do të na sjellë reshje të reja bore. Herë pas here vende-vende priten reshje intensive bore, por përsëri këto reshje nuk pritet të zgjasin shumë. Reshje bore përpos Kosovës priten edhe në shumë pjesë të Shqipërisë dhe Maqedonisë së Veriut.
Nga e premtja ulje e theksuar e temperaturave për shkak të depërtimit të acarit siberik.
Në fund të theksojmë se reshjet që priten gjatë kësaj jave do të jenë shumë më të dobëta krahasuar me intensitetin e reshje që patëm gjatë ditëve të kaluara, por megjithatë priten shtresa bore në shumë pjesë të rajonit tonë. Reshjet e borës mund të paraqiten shkurtimisht edhe në bregdetin shqiptar dhe rajone tjera të Shqipërisë ku fjollat e dëborës janë fenomen i rrallë./Meteoballkan
