Sot në Kosovë pritet të ketë ndryshim të motit. Përpos intervaleve kohore me diell, herë pas here, vende-vende priten rrebeshe lokale shiu me vetëtima dhe bubullimë. Këto sisteme stuhishë lokale pritet të depërtojnë nga Shqipëria dhe Mali i Zi edhe në disa vise të Republikës së Kosovës. Temperaturat do të fillojnë të pësojnë ulje sidomos në rajonet e stuhive eventuale, edhe pse edhe sot do të jemi nën ndikimin e rrymimeve të ngrohta ajrore nga jugperëndimi.
Në Shqipëri pritet mot i ndryshueshëm. Në veri të vendit priten rrebeshe lokalisht intensive shiu me vetëtima dhe bubullimë, ndërsa në viset tjera priten intervale kohore me diell dhe rrebeshe më të izoluara shiu me vetëtima dhe bubullimë. Jugu edhe nesër me mot kryesisht stabil.
Rrebeshe intensive dhe stuhi priten në Mal të Zi, ndërsa në Maqedoninë Veriore priten intervale kohore me diell dhe zhvillime të stuhive të lokalizuara.
Të shtunën në tërë rajonin priten zhvillime të fuqishme të stuhive lokale. Vende-vende priten rrebeshe intensive shiu me vetëtima dhe bubullimë sidomos në Shqipëri, por duke mos anashkaluar edhe disa pjesë të Kosovës e Maqedonisë së Veriut ku mund të ketë edhe intervale kohore me diell. Mund të ketë shtrëngata të fuqishme dhe vërshime të shpejta. Temperaturat do të fillojnë të ulen në tërë rajonin.
Të dielen ulje të ndjeshme të temperaturave dhe vende-vende me reshje shiu të cilat pritet të pushojnë pasdite./MeteoBallkan
