Sot në Kosovë pritet të mbajë mot i vranët dhe me reshje të herëpashershme shiu. Vende-vende priten reshje intensive si dhe pasdite ose në mbrëmje lokalisht priten rrebeshe të fuqishme shiu me vetëtima dhe bubullimë. Për shkak të rrymimeve të forta nga jugu do të jetë ngrohtë me temperatura maksimale deri në 16 gradë Celsius.
Rrebeshe të fuqishme shiu pasdite dhe në mbrëmje priten veçanërisht në Shqipëri ku lokalisht priten shtrëngata me reshje të rrëmbyeshme shiu e breshëri.
Edhe në Maqedoninë Veriore, Luginën e Preshevës dhe Mal të Zi priten rrebeshe lokale shiu me vetëtima dhe bubullimë. Rrebeshe shumë intensive priten në Mal të Zi, ndërsa në Maqedoninë Veriore dhe Kosovën lindore destabilizimi i fuqishëm i atmosferës pritet të ndodhë pasdite dhe në mbrëmje.
Edhe të shtunën në Kosovë na pret mot mjaft i paqëndrueshëm dhe me reshje e rrebeshe shiu. Fronti i ftohtë do të arrijë nga veriu duke ulur temperaturat dhe priten reshje bore në viset kodrinore-malore. Reshje kalimtare bore priten edhe në disa zona më të ulëta mbidetare duke përfshirë territorin e Podujevës, Prishtinës etj. në orët e pasdites ose mbrëmjes.
Reshje lokale të shtunën priten edhe në Shqipëri, Maqedoninë Veriore dhe Mal të Zi, por intensiteti i reshjeve do të jetë shumë më i dobët dhe i karakterit lokale. Temperaturat shënojnë ulje, por pritet kthjellim i pjesshëm i motit sidomos në Shqipëri.
Të dielën pas një mëngjesi me ngrica, gjatë ditës pritet mot stabil dhe me intervale të gjata kohore me diell./METEOBALLKAN