Sot në Kosovë pritet të mbajë mot i ftohtë, i vranët dhe me mundësi për riga të dobëta të rralla shiu. Në viset malore priten fjolla afatshkurtra, kryesisht të dobëta bore. Temperaturat priten të luhaten nga 2 deri në 6 gradë Celsius, pra nuk do të ketë dallim të madh nga minimalja me maksimalen.
Në Shqipëri pritet të mbajë mot kryesisht i vranët dhe me mundësi për riga lokale shiu. Do të jetë mjaft freskët, ndërsa mot i ngjashëm nesër pritet edhe në Maqedoninë e Veriut, Luginën e Preshevës dhe Mal të Zi. Pasdite priten intervale të shkrurtra kohore me diell në disa vise.
Të enjtën na pret mot plotësisht i vranët. Reshjet e shiut do të fillojnë të shtrihen nga jugu i Shqipërisë në drejtim të Maqedonisë së Veriut dhe Kosovës. Në jug të Shqipërisë dhe në Maqedoni priten reshje mesatare deri të dendura shiu. Në viset kodrinore-malore priten reshje shqote dhe bore.
Në Kosovë të enjtën pritet mot i ftohtë dhe me reshje shiu e bore, përpos në disa vise në veri dhe veriperëndim të vendit ku nuk priten reshje. Në viset kodrinore-malore priten reshje shqote e bore, ndërsa reshjet para të borës dhe shqotes mund të paraqiten edhe në disa qyteza ose qytete të Republikës së Kosovës. Reshje pak më intensive priten në jug dhe lindje të vendit.
Nga e premta do të vazhdojë të mbajë mot kryesisht i vranët dhe ende i ftohtë. Për fundjavë na pret mot kryesisht i vranët dhe i ftohtë, por me tendencë të stabilizimit të motit. Temperaturat pritet të shënojnë rrtije fare të lehta ndërsa rigat e dobëta afatshkurtra të shiut dhe borës në viset e larta do të jenë ende prezente nganjëherë. Në Shqipëri do të ketë më shumë diell dhe pritet përmirësim më i shpejtë i motit sidomos në viset mesdhetare.
Nga fillimi i javës së re pritet përmirësim i motit në tërë rajonin, me rreze diellore dhe rritje graduale të temperaturave./Meteoballkan