Edhe një javë mjaft e nxehtë për këtë periudhë kohore, por do të ketë një ndryshim ngase priten më shumë të reshura atmosferike sidomos në Shqipëri, por lokalisht edhe në Kosovë, Luginë dhe Maqedoninë e Veriut.
Java filloi me temperatura të larta dhe po ashtu pritet të përfundojë. Për këtë periudhë kohore këto temperatura janë jashtëzakonisht të larta.
E Marta në tërë territoret tona do të jetë një ditë kryesisht stabile dhe me diell, ndërsa sistemet frontale afrohen gradualisht. Gjatë natës shtimi i vranësiva do të fillojë në Mal të Zi dhe veri të Shqipërisë. Këto vranësira do të sjellin reshje lokale shiu dhe rrebeshe lokale me vetëtima dhe bubullimë.
Të mërkurën na pret mot shumë i ndryshueshëm, me intervale kohore me diell dhe vranësira të cilat do të dendësohen dhe do të sjellin stuhi të fuqishme shiu me vetëtima dhe bubullimë sidomos në territorin e Shqipërisë mesdhetare, por lokalisht edhe në vise tjera. Disa nga këto rrebeshe intensive kalojnë edhe në Dukagjin dhe pjesë tjera të Republikës së Kosovës pasditen ose mbrëmjen e së mërkurës. Temperaturat do të shënojnë ulje jo aq të theksuara, ndërsa rrebeshet lokale vonë të mërkurën përshijnë edhe Luginën e Preshevës dhe pjesë të Maqedonisë së Veriut. Të theksojmë edhe njëherë se stuhi mjaft të fuqishme me reshje lokalisht të rrëmbyeshme shiu të mërkurën parashihet të ketë në shumë pjesë të Shqipërisë dhe Mal të Zi.
Reshje intensive kalimtare të mërkurën vonë priten edhe në shumë pjesë të Republikë së Kosovës.
Nga e enjta do të ketë përmirësim të shkurtër të motit, ndërkohë që vazhdojnë temperatura të larta për këtë periudhë kohore, ndërsa rrebeshe shiu rikthehen përsëri të shtunën. Edhe të enjten dhe të premten do të ketë reshje, por reshjet do të jenë të karakterit krejtësisht lokal dhe kryesisht të koncentruara në territiorin e Shqipërisë.
Vonë të premten dhe herët të shtunën na pret një valë e re reshjesh kalimtare edhe në Kosovë, ndërsa të shtunën pasdite dhe të dielën sipas parashikimeve aktuale pritet përmirësim i motit. Temperaturat për shkak të reshjeve të herëpashershme dhe kalimit të cikloneve do të pësojnë ulje të lehta, por nuk pritet të jetë ftohtë, ndërsa lajmi i mirë është se këtë javë priten reshje paksa më të qëndrueshme sidomos në Kosovë ku ka aq shumë nevojë, megjithatë ende jo në sasi të kënaqshme në tërë rajonet.
Pra, në fund të theksojmë se na pret mot një mot i ndryshueshëm këtë javë, me intervale kohore me diell, erëra nga jugu dhe jugperëndimi, rrebeshe të herëpashershme shiu për shkak të temperaturave të larta edhe me vetëtima dhe bubullimë, por edhe intervalet me diell dhe pa reshje do të jenë të gjata.
