Java e parë e Muajit Mars do të karakterizohet me mot të ndryshueshëm. Fillimi i javës do të jetë i ftohtë, por i kthjellët dhe i thatë, me ngrica kryesisht të dobëta në viset tona kontinentale, ndërsa në viset mesdhetare do të jetë më ngrohtë. Gjatë mesditës ngrohtë në tërë rajonin.
Anticikloni i fuqishëm me qendër në Britaninë e Madhe do të shtrihet përmes Evropës qendrore në drejtim të Gadishullit Ballkanik duke na siguruar mot stabil dhe të kthjellët, por fillimisht të freskët. Nga mesi i javës do të kemi depërtimin e masave të ngrohta ajrore me origjinë nga Afrika veriore. Temperaturat në mesjavë do të jenë pranverore në tërë rajonin.
Afër fundit të javës presioni i ajrit do të fillojë të ulët dhe me këtë nënkuptojmë dobësimin e anticiklonit të fuqishëm. Nga Evropa veriore gradualisht do të shtrihet një ciklon së bashku me frontin e ftohtë ajror.
Ky ciklon do të kushtëzojë fillimisht ngritje të temperaturave, por njëkohësisht edhe shtim të vranësirave. Me depërtimin e frontit të ftohtë gjatë fundjavës do të kemi ulje të ndjeshme të temperaturave si dhe mundësi për reshje kalimtare shiu e bore. Reshjet e borës mund të përfshijnë shumë pjesë të Republikës së Kosovës, por bazuar në ecuritë aktuale sinoptike nuk priten reshje të mëdha dhe se reshjet do të jenë kalimtare.
Ishte ky parashikimi javor i motit bazuar në ecuritë më të fundit sinoptike dhe ndryshimet e vogla janë të mundshme. Për çdo ndryshim eventaul do ju lajmërojmë në postimet tona të përditshme./Meteoballkan
