Në Kosovë do të vazhdojë të mbajë mot kryesisht i thatë dhe pa reshje atmosferike edhe ditëve të ardhshme. Temperaturat nuk pritet të pësojnë ndryshime të mëdha, ndërsa riga të dobëta shiu ose ndonjë rrebesh afatshkurtër shiu me bubullimë mund të ndodhë në disa rajone. Temperaturat shënojnë rritje nga data 11 Shtator.
Në Shqipëri pritet mot paksa më i ndryshueshëm dhe me më shumë reshje, megjithatë nuk priten reshje konkrete shiu. Priten alternime të shpeshta mes intervaleve kohore me diell dhe vranësirave, ndërsa në jug të vendit do të ketë nganjëherë rrebeshe afatshkurtra shiu me vetëtima dhe bubullimë.
Mot kryesisht i thatë, me alternime mes vranësirave dhe intervaleve kohore me diell pritet ditëve të ardhshme edhe në territorin e Maqedonisë së Veriut, Malit të Zi dhe Luginës së Preshevës. Edhe pse lokalisht mund të ketë ndonjë rigë ose rrebesh të izoluar shiu, reshje konkrete aq shumë të nevojshme ende nuk pritet të ketë. Temperaturat pritet të shënojnë rritje të lehta.
Pra, në përgjithësi vazhdon mot i thatë në rajon, pa reshje konkrete deri në gjysmë të Shtatorit. Në Shqipëri reshjet lokale do të fillojnë të shpeshtohen sidomos në gjysmën jugore të vendit. Temperaturat shënojnë rritje të lehta, ndërsa netët dhe mëngjeset pritet të jenë mjaft të freskëta, madje edhe të ftohta./Meteoballkan
