Edhe sot kemi mot kryesisht stabil dhe mjaft i nxehtë, megjithatë pasdite në disa vise të Kosoves priten zhvillime të fuqishme konvektive. Zhvillimet konvektive pritet të kushtëzojnë stuhi të izoluara shiu me bubullima. Mund të ketë edhe breshër.
Nga nesër atmosfera do të jetë gjithnjë e më jostabile. Rrebeshet dhe stuhitë e shiut do të jenë më të përhapura dhe më përfshirëse. Po ashtu pritet të kemi ulje të temperaturave. Gjatë javës së re na pret mot mjaft jostabil, me intervale kohore me diell dhe zhvillime të fuqishme të vranësirave të shiut. Priten rrebeshe të shpeshta shiu me vetëtima dhe bubullimë. Po ashtu priten edhe shtrëngata, por do të kemi edhe periudha të gjata pa reshje.
Rrebeshe të fuqishme shiu priten në Kosovë, veriun e Malit të Zi, Maqedoninë Veriore dhe vende-vende edhe në Shqipëri. Rrebeshe priten po ashtu edhe në territorin e Kosoves Lindore.
Disa nga këto jostabilitetet atmosferike pritet të jenë të furishme, por të gjitha këto janë krejtësisht normale për periudhen kohore që gjendemi. Temperaturat e larta dhe ardhja e ajrit të paqëndrueshëm nga Atlantiku dhe kombinimi i këtyre dhe faktorëve tjerë normalisht prodhon efekte të bujshme atmosferike. Këto reshje pritet të jenë shumë të mirëseardhura ngase në Kosovë kemi shumë rajone të goditura nga thatësia ekstreme, edhe pse disa rajone po vuajnë nga shira të shpeshta, por të shpresojmë që shirat të jenë sa më të dobishëm dhe të mos ketë breshër. Mundësia për breshër lokal sipas parametrave meteorologjik është mjaft e lartë fatkeqësisht./MeteoBallkan