Sot, në Kramovik ka nisur mbjellja e drunjve të parë, që do të vazhdojë me mbjelljen e mbi 10 mijë drunjve të ndryshëm në tërë komunën e Rahovecit.
Drejtori i Drejtorisë për Urabizëm, Planifikim dhe Mbrojtje të Mjedisit, në Komunën e Rahovecit, Rumir Zhuniqi, ka thënë se ky projekt do t’ia ndryshojë pamjen Rahovecit.
Zhuniqi ka njoftuar se kontrata me kompaninë e përzgjedhur është specifike, dhe në të parashihet edhe ujitja e drunjve, krasijta e tyre, spërkatja, si dhe zëvendësimin i drunjve që dështojnë të zhvillohen.
Ai ka thënë se ky projekt ishte premtim elektoral, duke u shprehur i gëzuar që po realizohet, ndërkohë që ka apeluar te qytetarët që t’i ruajnë drunjtë dhe ta raportojnë këdo që e hasin duke i dëmtuar.
Njoftimi i plotë i Zhuniqit:
10 MIJË DRUNJ PËR RAHOVECIN
Një projekt serioz që do t’ia ndryshojë pamjen për të mirë komunës së Rahovecit, ka nisur sot. Komuna e Rahovecit, përkatësisht Drejtoria për Urbanizëm, Planifikim dhe Mbrojtje të Mjedisit, ka nisur së zbatuari projektin për mbjelljen e drunjve të llojëve të ndryshme, si Rrap, Bli, Catalpa etj, sipas së cilit parashihet mbjellja e mbi 10 mijë drunjve në tërë territorin e komunës sonë.
Përveç mbjelljes, jemi përkujdesur që kompania e kontraktuar të ketë për obligim edhe ujitjen e drunjve gjatë muajve të nxehtë (prill-shtator), krasitjen sezonale, spërkatjen për mbrojte nga insektet dëmtues, si dhe zëvendësimin e drunjve që mund të dështojnë për arsye të ndryshme.
Mbjellja e drunjve, përveçse do ta zbukurojë ambientin tonë, edhe do ta bëj më të pastër, duke i kontribuar mbrojtjes së mjedisit në përgjithësi, prandaj dua të apeloj te të gjithë qyetetarët që bashkë me ne t’i ruajnë këto drunj dhe ta raportojnë këdo që e hasin duke i dëmtuar ato. Ky projekt ishte zotim gjatë fushatës për zgjedhjet e fundit komunale nga Kryetari Smajl Latifi dhe ekipi i tij, prandaj gëzohem që po e realizojmë së bashku!
Urime të gjithë qytetarëve të komunës Rahovecit!
