Fronti i nesërm siç duket nuk do të jetë i dobët siç kishim përshtypjen fillestare dhe parashiheshin zhvillime të rrebesheve të lokalizuara. Në përditësimet e fundit modelet kanë shtuar dukshëm sasinë e reshjeve dhe potencën e frontit të ftohtë ajror që pritet të shkaktojë destabilizim të fuqishëm të motit ditën e Kurban Bajramit në Kosovë.
Mëngjesi ihershëm do të jetë stabil dhe kryesisht me diell duke mos përjashtuar mundësinë për ndonjë rigë ose rrebesh afatshkurtër shiu. Vranësirat më të theksuara do të fillojnë të shfaqen orëve të paradites për tu zhvilluar fuqishëm nga mesdita e tutje ku priten rrebeshe lokalisht të fuqishme shiu me vetëtima, bubullimë dhe mundësi për breshër. Vende-vende parashihen rrebeshe mjaft intensive, ndërsa pas kalimit të stuhive eventuale të lokalizuara do të pasojnë disa orë reshje shiu në gati tërë territorin e Republikës së Kosovës. Rrebeshe intensive me vetëtima dhe bubullimë parashihen sidomos në rajonin e Dukagjinit.
Fronti nuk do të arrijë në Shqipëri nesër përpos veriut të vendit. Në Shqipëri fronti arrin të enjten por dukshëm më i dobësuar./METEOBALLKAN