Reshjet e djeshme ishin vetëm hyrje dhe kontakti i parë i “ciklonit evropian” në territoret tona.
Sot mund të vërehet shumë më qartë ndikimi i ciklonit për shkak të vranësirave që na rrethojnë, ndërsa ka edhe zhvillime të rrebeshe të shiut me vetëtima dhe bubullimë. Po ashtu ka edhe breshër në disa lokacione.
Në vazhdim të ditës, pasdite vonë dhe në mbrëmje pritet intensifikim i reshjeve si dhe zhvillime të disa stuhive apo shtrëngatave me shi, erëra të fuqishme kalimtare dhe mundësi edhe për breshër. Po ashtu priten edhe vetëtima dhe bubullima masive apo shkarkesa të fuqishme rrufesh. Vranësirat e shiut do të kenë lëvizje kryesisht nga jugu në drejtim të veriut, ose nga juglindja në drejtim të veriperëndimit dhe nga jugperëndimi në drejtim të verlindjes, varësisht nga ecuria e masave ajrore ciklonike dhe zhvillimet e shtrëngatave rrotulluese në atmosferë.
Vende-vende mund të ketë rrebeshe mjaft intensive të cilat mund të shkaktojnë probleme me vërshime të shpejta.
Kushte të tilla të motit janë plotësisht normale kur masat ajrore jo stabile nga Atlantiku takojnë sipërfaqen e nxehtë nga masat e nxehta ajrore në Kontinent atëherë shkaktohet destabilizim i fuqishëm i atmosferës.
Reshjet e mëdha në Evropën perëndimore dhe qendrore nuk do të ndodhin në rajonin tonë, ngase sasia e reshjeve do të jetë më e vogël, por asesi nuk duhet nënvlerësuar fuqinë e ndonjë shtrëngate e cila mund të rritet dhe të shkaktojë problematika kalimtare. Kujdesi kurr nuk është i tepërt. Vërshime mund të ketë edhe për shkak të infrasturkturës së dobët, por edhe një herë të theksojmë se mund të ketë sasi të mëdha reshjesh në disa lokacione, por jo sikur në Evropë. Për këtë arsye themi se kjo nuk duhet të nënvlerësohet.
Në kohën e shtrëngates dhe shkarkesave të fuqishme të rrufeve më së miri është të gjeni strehim deri sa e tëra të kalojë.
Stabilizim të motit pritet të kemi nga e mërkura./Meteoballkan