Edhe pse sot dhe nesër në gati tërë Ballkanin është shumë më qetë, stuhi ka vetëm në Rumani dhe larg në Ukrainë, dje atmosfera ishte jashtëzakonisht jo-stabile sidomos në Slloveni dhe pjesë të Kroacisë. Në Slloveni u regjistruan edhe tornado.
Me afrimin e fronteve të reja të Atlantikut fillon përkeqësimi i motit fillimisht në Slloveni përsëri dhe pastaj edhe në Kroaci. Pasi që temperaturat janë të larta dhe ka energji të madhe në atmosferë frontet do të jenë përsëri mjaft problematike duke shkaktuar stuhi të fuqishme lokale dhe reshje intensive. Kjo pritet të ndodhë të enjten vonë (vetëm në Slloveni) e sidomos të premten që nga Sllovenia, pastaj në Kroaci dhe Bosnjë dhe Hercegovinë.
Pasi që frontet janë më masive dhe kapin shumë pjesë të Mesdheut që nga brigjet e Afrikes veriore kësaj radhe të shtunën fronti masiv do të arrijë në bregdetin shqiptar e malazez e pastaj në Kosovë, Maqedoninë Veriore, Serbi duke kushtëzuar ulje të ndjeshme të temperaturave dhe stuhi të fuqishme lokale me vetëtima, bubullimë dhe mundësi për breshër.
Pra, kësaj radhe frontet së bashku me stuhitë verore do të depërtojnë më thellë në jug duke na kapur edhe ne dhe jo sikur herave të kaluara kur vinin deri në Serbi dhe kalonin në Rumani.
Edhe dy shumë i kemi shumë të nxehta dhe kryesisht stabile. Të shtunën destabilizim i fortë i atmosferës dhe reshje shiu që nga bregdeti shqiptar e deri në Luginën e Preshevës. Vende-vende priten rrebeshe mjaft intensive dhe shtrëngata të fuqishme lokale me breshër./METEOBALLKAN
