Të enjten në Kosovë pritet të mbajë mot me intervale kohore me diell dhe vranësira të shpeshta të cilat do të sjellin edhe riga lokale shiu. Reshje shqote e bore vetëm në disa vise malore.
Temperaturat nuk pritet të pësojnë ndonjë ndryshim të madh dhe minimalja do të zbres deri në 1 gradë Celsius, kurse maksimalja pritet të arrijë deri në 11 gradë Celsius.
Reshje paksa më të shumta shiu priten në gjysmën jugore të Shqipërisë dhe në pjesën më të madhe të Maqedonisë së Veriut. Në viset malore do të ketë reshje shqote e bore. Reshjet do të vazhdojnë edhe gjatë natës dhe pritet intensifikim i reshjeve të borës në malet e Shqipërisë lindore dhe Maqedonisë perëndimore.
Riga shiu priten edhe në Luginë të Preshevës, kurse në Mal të Zi kryesisht thatë.
Të premten dhe të shtunën na pret mot me vranësira të shpeshta e nganjëherë me intervale kohore me diell sidomos të shtunën. Vende-vende do të ketë reshje shiu kryesisht në sasi të pakta, pak më intensive në disa vise të Shqipërisë, ndërsa vazhdojnë fjolla bore në viset malore.
Të dielën mundësi për reshje bore edhe në pjesë të Kosovës, por prapë pa reshje të mëdha sipas parashikimeve të tanishme./MeteoBallkan
