Dominimi i gjatë anticiklonik do të ndërpritet gjatë kësaj fundjave si në Kosovë, po ashtu edhe në Shqipëri si pasojë e ardhjes së një mase jo-stabile ajrore nga Atlantiku e cila nga Alpet pritet të formojë ciklonin sekondar në veri të Italisë, pastaj drejt Italisë së jugut dhe Greqisë. Cikloni do të jetë masiv dhe do të përfshijë gati tërë Adriatikun, por nuk priten reshje të mëdha në krejt rajonin.
Reshjet më intensive nga ky ciklon pritet të ti përfitojë Mali i Zi dhe disa pjesë të Shqipërisë sidomos veriu i vendit. Po ashtu reshje intensive priten në Hercegovinë, ndërsa në viset kontinentale të rajonin nuk priten reshje të mëdha përpos Sllovenisë dhe Bosnjës ku priten reshje paksa më intensive. Stuhi me bubullima priten në territorin e Greqisë.
Në Kosovë reshjet do të jenë të karakterit lokale dhe të herëpashershme, ndërsa reshje më intensive priten në veriperëndim dhe perëndim të territorit të Republikës së Kosovës.
Edhe pse kemi ardhjen e ciklonit dhe ndryshimin e kushteve të motit, temperaturat nuk do të pësojnë ndonjë ulje ekstreme. Gjithsesi moti gjatë ditëve të kaluara ishte shumë i ngrohtë dhe temperaturat ishin rreth 10 gradë më lartë se vlerat mesatare për fillimin e Nëntorit. Temperaturat do të kthehen në “normalitet”, ndërsa gjatë javës së re sipas të gjitha gjasave do të jemi nën ndikimin e masave të reja të fuqishme stabile anticiklonike
