Pas një fronti të dobët të ftohtë ajror i cili solli reshje kryesisht të dobëta lokale shiu tani e tujte pritet stabilizim i plotë i motit dhe rritje e temperaturave. Vetëm sonte mund të jetë ftohtë dhe me ngrica të dobëta për shkak të mbetjeve të ajrit të ftohtë, megjithatë ditëve të ardhshme për shkak të dominimit anticiklonik në disa rajone mund të kemi krijimin e mjegulles dhe inversionin e temperaturave. Kjo nënkupton “ngujimin” e temperaturave të ulëta në ato rajone ku eventualisht mund të kemi mjegull.
Në viset ku nuk do të ketë mjegull mund të themi se pritet mot pranveror me temperatura maksimale mbi 10 gradë Celsius, madje edhe mbi 15 gradë Celsius në disa vise. Pra ditët e ardhshme edhe pse jemi në kulmin e dimrit na pret më shumë mot pranveror. Vetëm ato rajone ku ka predispozita për mjegull më të qëndrueshme do të jetë ftohtë (kryesisht nëpër disa lugina), me temperatura rreth vlerave mesatare. Në viset ku nuk do të ketë mjegull temperaturat do të jenë dukshëm mbi vlera mesatare për këtë periudhë kohore.
Reshje atmosferike nuk priten këto ditë për shkak të kreshtës anticiklonike nga Afrika Veriore, Mesdheu dhe Evropa jugperëndimore. Mot i ngjashëm me ndryshime të vogla pritet të kemi afërsisht deri me datën 6 Janar kur pritet të kemi largimin e kreshtës anticiklonike dhe uljen e një lugu barik nga veriu i Evropës në kuadër të një cikloni nga Finlanda i cili mund të na sjellë reshje bore, por kjo mbetet ende për tu parë./MeteoBallkan
