Fotografitë mbresëlënëse tregojnë se si më shumë se 400 aeroplanë të llojeve të ndryshme janë parkuar në shkretëtirën e Kalifornisë, tani kur e tërë bota është izoluar nga pandemia e coronavirusit.
Pilotit Bryan Keith i është lejuar të fluturojë mbi Grumman Tiger në jug të Kalifornisë – më saktësisht mbi aeroportin logjistik në të cilin janë parkuar qindra aeroplanë, të cilët kanë rrezik minimal të dëmtohen nga të reshurat, për shkak se moti këtu kryesisht është me diell, transmeton Telegrafi.
Aeroplanët që janë në pronësi të Southwest, Delta dhe FedEx dhe disa kompanive tjera komerciale po “pushojnë” në shkretëtirën e Kalifornisë, për shkak se fluturimet komerciale tashmë janë ndalur për shkak të izolimit nga coronavirusit.
Ky “parking” gjigant në Victorville të Kalifornisë dikur ka shërbyer si bazë ajrore e ushtrisë amerikane, tani po konsiderohet si “parkingu” më i madh në botë i aeroplanëve – ndërsa vitin e kaluar aviokompania Southwest Airline filloi t’i parkojë aeroplanët e saj Boeing 737 Max që u nxore nga përdorimi si rezultat i dy rrëzimeve fatale.
Por, tani që janë anuluar të gjitha fluturimet komerciale për shkak të pandemisë dhe mijëra aeroplanë po qëndrojnë nëpër pista e hangarë, është shfaqur një problem i papritur – gjetja e hapësirës së mjaftueshme për t’i parkuar.
Kjo hapësirë ka kapacitet për 500 aeroplanë, e sipas kompanisë që e menaxhon ky numër gati sa nuk është arritur. Dielli dhe mungesa e të reshurave atmosferike u mundëson aviokompanive të mos brengosen shumë për fluturaket e tyre, pasi rreziku që t’i ekspozohen shiut dhe ndryshkut në këtë rajon është minimal.
Përveç Boeing 737 Max që ishin të parkuar më herët, tashmë aty ka edhe Boeing 747, 757, Airbus A310, A320 dhe McDonnell-Douglas MD-10 e MD-11.
“Është një pamje e jashtëzakonshme. Jam kureshtar ta di se miliarda dollarë vlejnë këta aeroplanë të parkuar. Dëshiroj të falënderoj stafin e kullës që ishin të mirë dhe më lejuan të fluturoj mbi këtë zonë”, ka deklaruar piloti Keith.
Një numër i madh i aeroplanëve ngjashëm me këta në Kaliforni, janë parë nëpër aeroportet kryesore të botës siç është ai i Seulit, Hon Kongut, Berlinit, Frankfurtit, Vjenës dhe në Arizona.
