Pas një kohe të gjatë me reshje atmosferike më në fund do të kemi një përmirësim të motit për shkak të depërtimit të masave stabile ajrore anticiklonike me origjinë nga Mesdheu dhe Afrika Veriore.
Gjatë netëve dhe mëngjeseve nëpër disa lugina mund të ketë mjegull e cila pritet të zhduket gjatë orëve të ditës kur edhe priten ngritje të konsiderueshme të temperaturave kur kemi para sysh se jemi në mes të dimrit. Rrymimet ajrore do ti kemi nga jugu dhe fillimisht do të jenë të dobëta. Pikërisht për këtë do të kemi një përkeqësim të përkohshëm të cilësisë së ajrit.
Përmirësimi i dukshëm i motit këto ditë fushate zgjedhore në Kosovë nuk do të thotë se dimri dhe reshjet kanë përfunduar, përkundrazi ende jemi në mes të dimrit dhe reshjet pritet të rikthehen përsëri nga fillimi i javës së re, fillimisht në formë shiu e ndoshta pas disa ditëve mund të kemi edhe rikthimin e reshjeve të dëborës.
Pra, kjo javë do të karakterizohet me mot mjaft stabil dhe me ngritje progresive të temperaturave ditore ku ato maksimalet për fundjavë fare lehtë mund të arrijnë deri në 20 gradë Celsius në disa rajone të Kosovës, dhe disa gradë edhe më nxehtë në disa rajone të Shqipërisë dhe Maqedonisë së Veriut. Netët dhe mëngjeset do të jenë të freskëta dhe me mundësi për ngrica të dobëta dhe mjegull vetëm nëpër disa rajone.
Fushat ajrore anticiklonike që do të na sjellin mot të këndshëm këto ditë gjatë fillimit të javës tjetër do të zëvendësohen në fusha ajrore ciklonike të cilat pritet të na sjellin reshje të reja shiu./Meteoballkan