Pas disa ditëve me temperatura dukshëm nën vlerat mesatare për këtë periudhë kohore, më në fund kemi një përmirësim të motit dhe rritje e temperaturave rreth vlerave mesatare, por assesi mos prisni ndonjë rritje të madhe të temperaturave siç jemi mësuar viteve të fundit edhe gjatë muajve vjeshtor.
Masa ajrore anticiklonike do të fuqizohet duke larguar vranësirat e dendura, megjithatë edhe pse moti do të përmirësohet dukshëm, vranësira lokale ditore do të ketë edhe nga nesër e tutje sidomos në pjesë të Republikës së Kosovës e më pak në viset tjera.
Masa më të ngrohta ajrore do të depërtojnë nga nesër (e Enjte) në Kosovë dhe rajon dhe temperaturat do të rriten për disa gradë dhe po ashtu do të kemi edhe intervale më të gjata kohore me diell. Shumë më shumë diell do të ketë në pjesë të Shqipërisë dhe Maqedonisë së Veriut ku temperaturat do të shkojnë pak mbi 20 gradë Celsius, madje në Shqipërinë mesdhetare e viset bregdetare do të ketë disa ditë mjaft të mira dhe me diell e vranësira të pakta lokale si dhe me temperatura nga 22 deri në 24 gradë Celsius varësisht nga rajoni në rajon.
Në Kosovë do të jetë më freskët për shkak të rrymimeve ajrore që do të vazhdojnë nga veriu edhe gjatë fundjavës, prandaj temperaturat nuk do të rriten shumë.
Sidoqoftë, nga nesër edhe Kosova pret përmirësim substancial të motit dhe rreze diellore edhe pse ndoshta jo ashtu siç do të dëshironim, ngase të premten pasdite dhe për fundjavë vranësira lokale më të përqëndruara rreth zonave kodrinore-malore dhe reshje të dobëta priten që nganjëherë të ketë në ato zona së bashku me erëra nga veriu./MeteoBallkan
