Policia është angazhuar në operacione për lirimin e hapësirave publike në plazhet e mbipopulluara.
Një ditë më parë, policia liroi dhe vuri në dispozicion të pushuesve rreth 4000 metra katrorë plazh, pronë publike e zaptuar në mënyrë të kundërligjshme nga disa shtetas.
Nga policia janë hequr rreth 960 shezlone, çadra dhe tavolina duke iu kthyer hapësira e plazhit pushuesve, ndërsa zona është hapur për pushuesit, shkruan Top Channel.
Ndërsa sot aksioni po zhvillohet në Durrës ku janë hapur 3500 metra katrorë hapësirë e lirë për pushuesit dhe po ndiqen penalisht shtatë persona për pushtim hapësire publike dhe fshehje të ardhurave.
Në funksion të këtij aksioni është vënë në ndjekje penale Drejtori i Taksave në Bashkinë e Durrësit. Pas një aksioni në Tale të Lezhës po ndiqen penalisht edhe Drejtori i Taksave të Bashkisë së Lezhës për shpërdorim detyre.