Reshjet e dendura të shiut të cilat priten ditëve të ardhshme mund të shkaktojnë mjaft probleme në shumë zona të rajonit tonë, e në theks të veçantë kemi veriun e Shqipërisë dhe rajonin e Dukagjinit në Kosovë.
Fushat e fuqishme ajrore me presion të ulët atmosferike që po zhvillohen nga Mesdheu perëndimor e deri në Gadishullin Ballkanik do të sjellin reshje intensive atmosferike në Ballkan: shi, shqotë , borë, shi të akullt etj. varësisht nga pozita gjeografike, relievi lartësia mbidetare etj.
Edhe në Kosovë kësaj radhe priten porcione të shpeshta të reshjeve të dendura të shiut sidomos në rajonin e Dukagjinit, duke mos përjashtuar edhe disa vise tjera lokalisht.
Por gjendja më alarmuese pritet të jetë në Shqipëri ku priten shira të shpeshta të dendura dhe të rrëmbyeshme dhe herë pas here edhe rrebeshe të fuqishme shiu me vetëtima dhe bubullimë. Këto reshje në Shqipëri do të rrisin dukshëm nivelin e lumenjve të cilët mund të dalin nga shtrati për të shkaktuar përmbytje. Po ashtu priten edhe rrëshqitje të dheut dhe gurëve ku fare lehtë mund të ketë bllokada të rrugëve.
Në Kosovë përpos reshjeve të shiut gjatë fundjavës pritet të kemi edhe ndryshime të temperaturave dhe shndërrime të reshjeve të shiut në reshje mesatare e nganjëherë edhe të dendura bore.
Në anën tjetër i tërë Gadishulli Ballkanik do të goditet po ashtu nga këto ciklone të fuqishme mesdhetare duke shkaktuar reshje të fuqishme shiu e bore. Reshje të dendura shiu priten që nga Greqia, pjesë të Maqedonisë së Veriut, Bullgaria, Rumania etj. Këto shtete do të gjenden në sektorin e nxehtë të masave ajrore, ndërsa Mali i Zi, Bosnja dhe Hercegovina, Kroacia, Sllovenia, Serbia etj do të gjenden në sektorin e ftohtë dhe për pasojë do të ketë dimër të vërtetë me reshje të dendura bore. Shqipëria dhe Maqedonia Veriore do të gjenden në sektorin e nxehtë, ndërsa Kosova diku në mes.
Pra, gradualisht po hyjmë në një periudhë me reshje herë pas here të dendura shiu e bore. Reshjet mund të shkaktojnë probleme të mëdha veçanërisht në Shqipëri, por duke mos përjashtuar edhe rajonin e Dukagjinit në Kosovë./Meteoballkan
