Më shumë se 740 zjarrfikës në Portugali, ku po regjistrohen temperatura rekorde, po përpiqen të shuajnë një zjarr pyjor në jug të këtij vendi.
Për shkak të zjarreve katastrofike që goditën Portugalinë vitin e kaluar dhe në të cilët 114 njerëz u vranë, shërbimet e mbrojtjes civile dërguan një paralajmërim për qytetarët rreth rrezikut të zjarrit në disa rajone, duke përfshirë rajonin rreth Lisbonës, shkruan AP. Në Lisbonë, u mat një temperaturë prej 43 gradësh.
Zjarri filloi të premten në zonën kodrinore të jugut të rajonit të Algarve, ku zyrtarët duhej të evakuonin të gjitha fshatrat.
Ajri i ngrohtë nga Afrika e Veriut ka shkaktuar valët më të këqija të nxehtësisë në Gadishullin Iberik që nga viti 2003, i cili ishte gjithashtu viti në të cilin u regjistruan shumë zjarre pyjore.
Vetëm këtë javë në Spanjë, tre vetë vdiqën për shkak të temperaturave të larta – dy njerëz vdiqën nga një valë e nxehtësisë në Murcia në juglindje, ndërsa një mashkull vdiq në Barcelonë.
Ushtria spanjolle po ndihmon shërbimet emergjente për të luftuar zjarrin në Nerva në Spanjën jugore, por zjarri ende nuk është lokalizuar. Në një zjarr që shpërtheu pranë Madridit, dy persona u plagosën dhe gjashtë shtëpi u dëmtuan.
Temperaturat e larta kanë shkaktuar zjarre në shumë vende evropiane nga Greqia e deri në Finlandë.
Muajin e kaluar në Greqi, 91 vetë u vranë në qytetin lindor të Attikës. Thatësira më e madhe në 10 vitet e fundit ka shkaktuar tharjen lumenjve në Holandë dhe goditi fermerët në Gjermani. Fushat e grurit u shkatërruan në të gjithë Evropën veriore, duke rritur çmimet e këtij drithi.
Në Skandinavi, temperaturat ishin shumë të larta deri në disa ditë më parë – në Suedi si dhe në Finlandë regjitroheshin temperatura që arrinin deri në 30 gradë, edhe pse temperatura mesatare për këtë kohë është 19.
Autoritetet në të dy anët e Detit Baltik, Suedi dhe Poloni, paralajmëruan notarët për shkak të lulëzimit të algave toksike që po përhapen për shkak të temperaturave të larta. /MeteoBallkan
