Faqja meteorologjike amerikane, Accuweather, e cila rezultoi jashtëzakonisht e saktë në vitet e fundit, e si shembull mund ta marrim pikërisht këtë verë, kur për zonën tonë parashikoi një verë me reshje të konsiderueshme shiu të cilat vende- vende shkaktuan edhe përmbytje të mëdha dhe dëmtim të kulturave bujqësore.
Siç mund të shihet nga fotoja e bashkangjitur, në pjesën më të madhe të Mesdheut, pritet të ketë mot jostabil dhe me reshje të theksuara në nivel lokal.
Shumica e Evropës Qendrore dhe Lindore do të vazhdojë të ketë temperatura të ngrohta mbi mesataren dhe në kombinim me reshje që pritet të jenë mbi mesataren priten përmbytje, veçanërisht përgjatë bregdetit verior të Detit të Zi.
Moti i ngrohtë deri nga mesi i tetorit pritet edhe në Evropën Perëndimore, ndërsa Portugalia, pjesë të gadishullit të Pyrenees dhe Francës perëndimore mund të goditen nga erërat e forta.
Temperaturat e larta të ajrit që këtë verë kapën veriun e Evropës duke i sjellë Suedisë së papërgatitur zjarre katastrofike do të vazhdojnë të përbëjnë kërcënim edhe gjatë vjeshtës.
Ngrohja e vazhdueshme që dominoi pjesën më të madhe të Evropës Perëndimore gjatë gjithë verës ndonëse pritet të ulet deri në tetor, temperaturat do të vazhdojnë të jenë shumë më të larta se ato normale nga Ishujt Britanikë në Francë dhe Gjermani.
Stuhitë verore që goditën disa pjesë të Italisë, Greqisë dhe Gadishullit Ballkanik Perëndimor përmbytën disa vende ndërsa të tjerat pësuan një verë të nxehtë dhe të thatë.
Ky model pritet të vazhdojë edhe në shtator përpara se të pritet ndonjë ndryshim i rëndësishëm drejt një moti të lagësht nga tetori në nëntor.
Sistemet e stuhisë me lëvizje të ngadalta do të sjellin rrebeshe në një frekuencë më të madhe në të gjithë Italinë dhe në pjesët fqinje të Gadishullit Ballkanik Perëndimor, midis Alpeve Dinarike dhe Detit Adriatik.
Ky mot i lagësht do të zgjerohet në Greqi duke shuar zjarret në zonat e rrezikuara por në të njëjtën kohë duke sjellë rrezikun për përmbytje të shpejta dhe rrëshqitje, sidomos në zonat që kanë përjetuar zjarre gjatë viteve të fundit.
Zonat me rrezik më të madh për tu dëmtuar nga stuhitë do të jenë në të gjithë Italinë dhe Greqinë.
Moti i lagësht në rritje gjithashtu do të kufizojë ngrohtësinë në të gjithë rajonin. Pra, derisa shtatori pritet të jetë një muaj më i ngrohtë se normalja, temperatura nën normale priten nga tetori në nëntor.
