I izoluar, i ndotur dhe mbi të gjitha shumë i ftohtë. Është qyteti rus që është ndërtuar mbi mizori e djersë të burgosurish.
Por, gjithashtu, është një qytet me pasuri të mëdha, ndoshta sepse ekzistecna e një qyteti të tillë as që do të imagjinohej. Qyteti Norilsk, që gjendet rreth 400 kilometra në veri të Rrethit Arktik, ka rezervat më të mëdha të nikelit, bakrit dhe padaliumit në planetin Tokë.
Qyteti siberian kishte nisur të ndërtohej nga të burgosurit e Gulagut në vitin 1935 dhe gjatë procesit 20-vjeçar, 500 mijë sllavë ishin pjesë e ndërtimit. Mijëra prej tyre kanë humbur jetën, shkruan MeteoBallkan.
Sot, Norilsku është qyteti më verior në planet dhe vend i ekstremeve. Temperatura mesatare atje është -10 gradë Celsius, ndërsa shkon deri në -55 gradë Celsius gjatë dimrit që s’përfundon kurrë.
Për dy muaj të tërë gjatë vitit, në qytetin e ftohtë mbretëron natë thuajse totale, ndërsa bora në qytet qëndron për 8 deri në 9 muaj në vit.
Përkundër kësaj, qyteti ka mbi 170 mijë banorë. Fëmijët detyrohen që të rrinë mbyllur për muaj të tërë. Për këtë arsye qyteti ka ndërtesa të mëdha ku mund të bëhen sporte të ndryshme brenda tyre, siç është çiklizmi e vrapimi.
Gjatë ditëve më të ftohta, një konvoj prej 15 deri në 20 autobusë i transporton punëtorët në vendet e tyre të punës. Nëse prishet ndonjëri prej tyre, pasagjerët me shpejtësi mund të evakuohen te autobusi tjetër. Kjo kolonë qarkullon tre herë në ditë.
Norilsku së pari ishte vizituar në vitet e para të shekullit 20, pasi që u zbuluan pasuritë minerare, të formuara 250 milionë vite më parë.
Në vitin 1935, Bashkimi Sovjetik filloi ndërtimin e komplekseve metalurgjike për shfytëzimin e mineraleve e për këtë arsye edhe shfrytëzimin e të burgosurve, të cilët ishin dënuar që të jetojnë në Arktikun e ftohtë.
Bashkimi Sovjetik ra në vitin 1991 por qyteti mbeti, dhe sot Norilsku zë vendin e parë në botë për prodhimin e nikelit dhe paladiumit. Prodhimi aty përbën 2% të GPD-së së Rusisë.
Megjithatë, kushtet për punëtorët ende janë të rënda. Pagat jepen çdo 90 ditë, ndërkaq pensionimi bëhet në moshën 45-vjeçare.
Norilsku është vazhdimisht një prej 10 qyteteve më të ndotura në botë. Çdo vit, më shumë se 2 milionë ton gazi (kryesisht dioksid sulfuri, oskid nitrogjeni, karbon e fenol) lëshohet në atmosferë, shkruan MeteoBallkan.
Jetëgjatësia është 10 vite më e ulët se në rajone të tjera të Rusisë, ndërkaq rreziku nga kanceri është dy herë më i lartë dhe sëmundjet e frymëmarrjes janë shumë të shpeshta.
Studimet kanë treguar se kualiteti i dobët i ajrit është përgjegjës për 37% të vdekjeve të fëmijet dhe 21.6% te të rriturit. Cikli i ditëve dhe netëve polare, po ashtu ka një influencë në organizimin e njeriut, që sjell vështirësi të shumta adaptimi në kushtet ekstreme.
Errësira pengon lirimin e hormonit të melatoninës, që rregullon shumë funksione të organizmit. Kjo gjë shkakton mungesën e gjumit dhe probleme në sistemin nervor, lodhje të përhershme, parehati psikologjike dhe depresion. Mungesa e melatoninës ndihmon edhe plakjen e parakohshme dhe i hapë rrugën sëmundjeve kancerogjene. /MeteoBallkan/
