Drejtoria e Bujqësisë në Komunën e Rahovecit ka publikuar disa rekomandime për fermerët, për shkak të kushteve atmosferike dhe rënies së temperaturave.
Sipas kësaj Drejtorie, këto ditë temperaturat pritet të bien nën 0°C, gjë që paraqet rrezik për kulturat e mbjella, sidomos në perimtari, pemëtari dhe vreshtari.
Rekomandimet e Drejtorisë së Bujqësisë në Rahovec për kultivuesit në fushë të hapur janë:
– Ujitja në mëngjes ndihmon në ruajtjen e temperaturës në rrënjë.
– Mos përdorni plehra azotikë gjatë kësaj periudhe.
– Mbulojeni tokën dhe kulturat me najllon ose material mbrojtës gjeotekstil.
Rekomandimet për kultivuesit në sera:
Shtoni një shtresë të dytë të najllonit brenda serës ose përdorni gjeotekstil.
– Përdorni mjete të thjeshta për ngrohje.
– Ajrosni lehtë në mëngjes për të shmangur lagështinë e tepërt.
– Sigurohuni që najlloni të jetë i shtrirë dhe i mbyllur mirë.
Ndërsa, rekomandimet e tyre për pemët dhe vreshtat janë:
– Mos kryeni krasitje të thellë në këtë periudhë.
– Spërkatja e lehtë me ujë para agimit (në orët e hershme) mund të ndihmojë në mbrojtjen e luleve nga ngricat.
– Ju inkurajojmë që të merrni masa mbrojtëse dhe të jeni të kujdesshëm gjatë këtyre ditëve të ndjeshme për bujqësinë.
Përmes telefonit, drejtori i bujqësisë në Rahovec, Berat Duraku ka treguar për KALLXO.com se kanë marrë disa telefonata nga fermerët për dëme, por me të dalë në terren nuk është vlerësuar se kanë pësuar dëme.
“Në vreshta p.sh. në bazë të agronomët e mi çka i kam këtu në Drejtori, nuk e kanë cilësu si dëm këta me ditë të sotme edhe pse kjo është pak herët me u vrejt edhe me dal në përfundim që është dëm ose s’është” – ka thënë Duraku, më 07.04.2025.
Duraku tha se sipas parashikimeve në mbrëmjen e datës 07.04.2025 pritet të ketë temperatura në – 5°C, të cilën ai e vlerësoi “nata ma e rrezikshmja”.
Kurse, komunat tjera: Lipjan, Mitrovicë e Jugut, Vushtrri, Ferizaj, Gjakovë i kanë thënë KALLXO.com se deri më tani nuk kanë marrë ndonjë ankesë apo kërkesë nga fermerët për kompenzim të dëmit në tokat e tyre bujqësore nga të reshurat e borës.
