Reshjet e borës pritet të rifillojnë sonte gjatë natës në disa pjesë të Kosovës dhe pritet të fillojnë në pjesën më të madhe të Maqedonisë së veriut dhe Shqipërisë Kontinentale.
Tani kemi ciklonin e fuqishëm i cili po fillon të ndikojë duke sjellur reshjet më të reja atmosferike.
Siç kemi theksuar reshjet më të dendura nga ky ciklon priten në veri-verilindje të Shqipërisë, pjesën më të madhe të Maqedonisë së Veriut dhe jug të Kosovës. Reshje dukshëm më të pakta priten në veri të Republikës së Kosovës dhe zonat përreth, megjithatë edhe atje priten disa centimetra të reja shtresash bore.
Cikloni do të kushtëzojë depërtimin e mëtutjeshëm të masave të ftohta polare, ndërsa stuhi bore priten sidomos në viset kodrinore-malore të Shqipërisë dhe Maqedonisë, por edhe të Kosovës. Reshje bore priten edhe në zonat e ulëta, madje mund të ketë edhe në viset bregdetare në veri të Shqipërisë dhe në Mal të Zi.
Pra, pas ndërprerjes së reshjeve të borës ato pritet të rifillojnë dhe të intensifikohen sidomos në Shqipëri, Maqedoninë Veriore dhe jug të Kosovës.
Reshje të herëpashershme bore priten edhe të Hënën ndërsa temperaturat vazhdojnë të ulen.
Nga e Marta cikloni do të dobësohet plotësisht dhe reshjet do të ndërpriten, por pason acar i fuqishëm orëve të mëngjesit./MeteoBallkan
