Zëvendësministri i Infrastrukturës, Hysen Durmishi ka thënë se në gjithë territorin e Kosovës janë duke punuar kompanitë e mirëmbajtjes.
Durmishi tha se si pasojë e reshjeve të vazhdueshme, pjesëmarrësit në komunikacion duhet të kenë kujdes të shtuar.
“Ne vazhdimisht jemi në teren. Në gjithë territorin e Kosovës kompanitë e mirëmbajtjes janë vazhdimisht duke punuar. Megjithë punën e pandërprerë, reshjet e borës janë të vazhdueshme, prandaj kërkojmë nga të gjithë pjesëmarrësit në komunikacion për kujdes të shtuar dhe përshtatje me kushtet në rrugë. Në përgjithësi të gjitha rrugët janë të kalueshme”, ka thënë ai.
Ndërkaq, Qamil Feka, i cili është pjesë e Departamentit të Menaxhimit të Rrugëve në Ministrinë e Infrastrukturës, ka dhënë detaje mbi gjendjen e rrugëve që prezantojnë rrezikshmëri të lartë.
Ai në një intervistë për Radio Dukagjinin, ka treguar se më të rrezikshme për qarkullim aktualisht janë rrugët rajonale të Podujevës; ajo që të çon në Kërpimeh, Bajgorë, Mitrovicë dhe rruga për në Prevallë.
Feka tutje ka thënë se pavarësisht që në të gjitha rrugët e Kosovës që nga orët e hershme të mëngjesit ka pasur reshje të bores, ekipet e mirëmbajtjes së rrugëve janë në terren.
“Të gjitha kompanitë e kontraktura janë në terren nëpër rrugët rajonale e nacionale, nëpër autoudhët dhe të gjitha rrugët të cilat janë nën përgjegjësinë e Ministrisë së Infrastrukturës, ekipet janë në terren”, ka deklaruar Feka.
Në anën tjerë Policia e Kosovës ka apeluar te qytetarët për kujdes të shtuar në trafik, pas reshjeve të dendura të borës që kanë nisur gjatë natës së mbrëmshme e kanë vazhduar edhe sot.
Nga policia kanë bërë të ditur se qarkullimi nëpër rrugë është vështirësuar, teksa është përmendur se qysh para dy javësh është kërkuar që drejtuesit e automjeteve të kenë pajisje dimërore në veturat e tyre.
“Tani, duke qenë se bora e parë ka filluar të bije, në rrugë ka borë e gjatë natës për shkak të temperaturave të ulëta mund të ketë edhe akull. Kërkohet kujdes i shtuar nga të gjithë pjesëmarrësit në trafik me theks të veçantë drejtuesit e automjeteve”, thuhet në komunikatën për media.
