Në ishullin e Evias të pushtuar nga flakët është shënuar këtë të martë një incident i rëndë, teksa një avion i angazhuar në shuarjen e zjarrit është rrëzuar gjatë operacionit.
Avioni Canadair, me pilotë nga skuadra 355 e transportit taktik luftarak të Elefsinës është rrëzuar gjatë një transmetimi live të operacionit për shuarjen e flakëve në një luginë, në fshatin Potami.
Alarmi u ngrit pasi forcat zjarrëfikëse pak para orës 15:00 lajmëruan edhe zyrtarisht se një avion Canadair është rrëzuar në Karystos, në zonën e Platanistos.
Ekuipazhet ushtarake sakaq kanë nxituar për të shkuar në zonë, në mënyrë që të kuptojnë saktësisht se çfarë ka ndodhur dhe në çfarë gjendje janë pilotët, ndërkohë që është aktivizuar edhe qendra kombëtare e operacioneve.
Në videon që po bën xhiron e mediave ndërkombëtare avioni shihet fillimisht duke lëshuar ujë, e më pas bën një kthesë djathtas por shumë shpejt humb lartësinë, duke lënë përshtypjen e një dështimi mekanik.
Canadair që u rrëzua është një CL-215, që ishte ngritur në fluturim nga Volosi dhe nuk ka një sistem nxjerrjeje në rast incidenti për kapitenin dhe bashkëpilotin.
“Të martën, 25 korrik 2023 në orën 14:52, një avion CL-215, me një ekuipazh prej dy aviatorësh, i Skuadronit të Transportit Taktik të 355-të të Krahut të 112-të Fighter, ra gjatë një operacioni për fikjen ajrore të zjarreve. Një operacion kërkim-shpëtimi është duke u zhvilluar për dy pilotët. Në zonë janë nisur 1 helikopter Super Puma dhe 1 helikopter AB-205 i Forcave Ajrore, si dhe 1 helikopter S-70 i Marinës”, thuhet në njoftimin e Forcave Ajrore greke për ngjarjen.
Sakaq, kujtojmë se Platanistos dhe Livadi janë dy fshatrat ku ekipet e tokës dhe vullnetarët kishin përqendruar vëmendjen për të shuar flakët, që po përpinin edhe banesat.
Sipas autoriteteve greke në vendngjarje po operojnë 93 zjarrfikës me tre grupe këmbësore dhe 32 automjete, ndërsa nga ajri ka ndihmë nga helikopterë dhe avionë si dhe makineri tokësore dhe ujëmbajtëse të pushtetit Lokal.
