Ashtu siç kemi paralajmëruar sonte do të fillojnë reshjet e borës edhe në Kosovë. Sot gjatë ditës fillimisht në juglindje të Shqipërisë pritet të fillojnë reshjet e borës të cilat vetëm se kanë filluar. Gjatë pasditës dhe mbrëmjes reshjet do të shtrihen në tërë rajonin gradualisht. Reshjet e borës do të jenë të intensitetit mesatar dhe të dobët varësisht nga vendi. Reshje të herëpashershme bore priten edhe gjatë natës dhe nesër në mëngjes por temperaturat do të ngriten nesër gjatë ditës dhe reshjet do të pushojnë.
Gjatë ditës së Premte dhe të Shtunën shkurtimisht do të jemi në sektorin e nxehtë të ciklonit, pra temperaturat do të jenë relativisht të larta,ndërsa në Shqipëri priten reshje lokale apo rrebeshe lokale shiu me vetëtima dhe bubullimë.
Reshjet e borës do të rikthehen përsëri në mbrëmjen a së Shtunës kur pritet edhe krijimi i shtresave të borës. Dita e diel do të na gdhijë bardhë në shumicën e territorit të Republikës së Kosovës, kurse temperaturat përsëri do të shënojnë ulje të theksuar. /Meteoballkan.
