Afrimi i ciklonit të fuqishëm nga veriperëndimi dhe ardhja e frontit të ftohtë po shkakton erëra të fuqishme nga jugperëndimi në disa vise të Shqipërisë dhe Republikës së Kosovës.
Erëra të fuqishme ka edhe në rajonin e Sangjakut, veri të Malit të Zi dhe verilindje të Shqipërisë.
Gjatë natës deri në orët e mëngjesit këto erëra do të vazhdojnë herë pas here me intensitet të lartë, por nuk priten erëra ekstreme. Mund të ndodhin problematika të vogla, por pa ndonjë rrezik ekstrem
Erërat më të fuqishme në Kosovë parashihen në perëndim, jugperëndim dhe veriperëndim të vendit, pastaj në disa vise në pjesët qendrore të vendit dhe thellë në verilindje të Kosovës.
Erërat më të fuqishme do të jenë në viset kodrinore-malore të këtyre zonave, por nganjëherë edhe në viset e ulëta.
Shpejtësia maksimale pritet të jetë gjatë orëve të hershme të mëngjesit rreth 60 km-h, në disa zona e mund të ndodhë deri në 70 km-h në ndonjë zonë të caktuar, por të gjitha do të jenë kalimtare dhe fuqia më e madhe siç e cekëm më lartë do të jetë në viset kodrinore-malore.
Edhe pse nuk pritet ndonjë ekstrem i madh kujdesi duhet gjithmonë të jetë në nivele të larta.
Erërat jugore dhe jugperëndimore do të dobësohen dikur në mëngjes me ardhjen e frontit të ftohtë dhe pastaj do të fillojnë të fryjnë erëra nga veriu dhe verilindja që kalimthi mund të jenë të fuqishme, por me ardhjen e reshjeve atmosferike erërat pritet paksa të qetësohen por do të vazhdojnë edhe më tutje me intensitet më të ulët.
Erërat veriore dhe verilindore mund të fuqizohen nganjëherë përsëri të premten dhe të shtunen me zhvendosjen e ciklonit larg në lindje dhe ardhjen e anticiklonit të Azoreve./MeteoBallkan
