Zhvillimet e vranësirave konvektive janë karakteristikë e stinës së pranverës, verës, por edhe vjeshtës së hershme. Zakonisht shpeshherë ndodhin edhe gjatë dimrit në viset mesdhetare në Shqipëri dhe Mal të Zi.
Me zhvillim konvektiv nënkuptojmë zhvillime vertikale të vranësirave në atmosferë dhe këto vranësira zakonisht sjellin rrebesh të fuqishëm lokal shiu me vetëtima dhe bubullimë dhe në rastet kur atmosfera është shumë jo-stabile atëherë zhvillohen shtrëngata të fuqishme me breshër.
Kohëve të fundit ky fenomen plotësisht normal po ndodhë edhe gjatë stinës së dimrit sigurisht për shkak të temperaturave mbi mesataren.
Sot dhe nesër pasditeve në Kosovë, Shqipëri dhe Maqedoninë Veriore lokalisht do të ketë kësi lloj zhvillimesh me rrebeshe lokale shiu me vetëtima dhe bubullimë. Në disa lokacione priten rrebeshe të fuqishme dhe në lokacione tjera reshje shumë më të pakta edhe kjo karakteristikë e këtyre zhvillimeve. Vetëtimat dhe bubullimat pritet të jenë të rralla dhe sporadike në shumicën e rajoneve, por në disa vise mund të ketë zhvillime paksa më të fuqishme.
Normalisht nuk priten zhvillime të përmasave të mëdha ngase këto ndodhin zakonisht kur temperaturat janë shumë më të larta dhe prezent kemi ajrin e paqëndrueshëm, por sot dhe nesër do të jemi dëshmitarë të këtyre zhvillimeve në disa rajone ku do të ketë gjasa edhe për breshër të imët./MeteoBallkan
