Edhe dje lajmëruam destabilizim edhe në Kosovë, por reshje pati shumë pak dhe në shumë pak rajone, ngase energjia kryesore e rrebesheve ishte në Serbi dhe Maqedoninë Veriore.
Sot edhe në Kosovë pasdite pritet destabilizim i atmosferës me zhvillime të fuqishme të vranësirave konvektive të cilat do të kushtëzojnë rrebeshe lokale shiu me vetëtima, bubullimë dhe mundësi edhe për breshër në disa lokalcione.
Më shumë rrebeshe priten në veri, verilindje,lindje, juglindje, veriperëndim dhe pjesë të qendrës së Kosovës. Më së paku priten në jugperëndim të Kosovës.
Sidoqoftë, rrebeshe lokale sot priten edhe në veri të Malit të Zi, Luginën e Preshevës, disa vise në Maqedoninë Veriore dhe rrallë në disa vise të Shqipërisë.
Ky front do të kushtëzojë freskim të shumëpritur të motit në shumë vise tona kontinentale, por nga e hëna pêrsëri pritet vapë afrikane.
Të dielën pritet mot më i këndshëm për shkak të uljes së lehta të temperaturave, por prapë temperaturat maksimale arrijnë rreth 28- 30 gradë Celsius./Meteoballkan