Një sistem masiv ajror me presion të lartë atmosferik nga Kanadaja po zbret qendrës në Shtetet e Bashkuara të Amerikës me temperatura nga -20 deri në -35 gradë Celsius. Ky anticiklon i pajisur me ajrin esktrem të ftohtë polar do të nxisë zhvillimin e një cikloni të fuqishëm diku në Meksikë dhe Gjirin e Meksikës në jug të SHBA. Cikloni të dielën pritet të godasë fuqishëm Washingtonin dhe Nju Jorkun me akull masiv dhe borë.
Priten reshje të dendura bore, reshje të fuqishme akulli dhe thellë në jug rrebeshe të fuqishme shiu me vetëtima dhe bubullimë. Pastaj temperaturat do të shkojnë në ekstrem gjatë dhe pas reshjeve të dëborës.
Mediat vendase paralajmërojnë se mëngjesin e së shtunës, temperaturat do të zbresin ndjeshëm nën zero. Autoritetet kanë paralajmëruar banorët të përgatiten për kushte të rrezikshme udhëtimi dhe ndërprerje të mëdha të energjisë elektrike, të cilat mund t’i lënë njerëzit pa ngrohje.
Mungesa e ngrohjes në mënyrë të veçantë do të jetë shumë e rrezikshme sepse i ftohti i acartë pritet të vazhdojë edhe pasi të kalojë stuhia.
Në Teksas, Guvernatori Greg Abbott shpalli gjendjen e katastrofës natyrore për 134 qarqe të shtetit, me qëllimin të aktivizohen mekanizmit e mbështetjes së popullatës që përpara mbërritjes së valës së të ftohtit ekstrem. Fronti i pamëshirshëm arktik duket se do ta godasë edhe më egërsisht rajonin e njohur si Midwest-in, duke sjellë këtu temperatura edhe më të rrezikshme.
Termometri pritet të shënojë më e shumta deri në minus 46 gradë në disa pjesë të Minesotës dhe Dakotës së Veriut. Në këto kushte, sipas ekspertëve, ngrirja mund të ndodhë vetëm 10 minutash.
I ftohti brutal pritet të zhysë në borë e akull edhe Washington DC-në. Modeli amerikan tregon borë të dendur për pjesën më të madhe të korridorit ndërshtetëror 95 – nga Filadelfia në qytetin e Nju Jorkut dhe në Boston – me reshje që zgjasin deri të hënën në mëngjes./MeteoBallkan
