Edhe pse gjendemi nën regjimin e temperaturave mjaft të larta verore gjatë dites së sotme në front i dobët, i ftohtë ajror pritet të depërtojë drejt disa viseve ballkanike duke shkaktuar stuhi potencialisht të fuqishme në disa shtete sidomos në veriun e Kroacisë dhe Malit të Zi.
Fronti do të vijë nga veriperëndimi dhe fillimisht do të përfshijë pjesë të Sllovenisë, Kroacisë, Bosnjes, Malit të Zi, Serbisë dhe Kosoves. Shqipëria nuk do të ndjejë pothuajse fare këtë front.
Përgjatë tërë rajonit priten zhvillime të shtrëngatave të izoluara të cilat nuk do të zgjasin shumë dhe nuk do të përfshijnë as gjysmën e territoreve të vendeve të lartëcekura për shkak se fronti është i dobët dhe jo shumë i pasur me lagështirë, megjithatë në ato rajone ku pritet të ketë destabilizim mund të krijohet ndonjë (ose disa) shtrëngatë e fuqishme me breshër, ngase temperaturat mjaft të larta dhe ardhja e një sasie të ajrit të ftohtë jo-stabil pritet të shkaktojë procese atmosferike siç janë zhvillimet konvektive me shkarkesa atmosferike.
Më së shumti rrebeshe priten në veri-lindje të Kroacisë, pjesët qendore, veriperëndimore dhe juglindore të Bosnjës dhe Hercegovinës, jugperëndim të Serbisë, veri të Malit të Zi dhe disa vise të Republikës së Kosoves.
Fronti në fund do të arrijë në Kosovë, paksa i dobësuar, por ende mund të prodhojë ndonjë shtrëngatë me vetëtima dhe bubullimë. Të gjitha reshjet do të jenë të karakterit krejtësisht lokal.
Fronti pritet të freskojë ajrin përkohësisht, por vala e nxehtësisë do të vazhdojë dhe me kalimin e frontit rikthehen temperaturat e larta dhe rrezet e shumta diellore./MeteoBallkan
Image By: Ventusky
