Përderisa në vendin tonë sot kishim mot stabil, të nxehtë dhe me diell, disa pjesë të rajonit ballkanik sot u goditen nga stuhi mjaft të fuqishme dhe të rrezikshme të cilat kushtëzuan rrebeshe jashtëzakonisht të fuqishme shiu me vetëtima dhe bubullima masive, shtrëngata të fuqishme dhe breshër. Stuhi të fuqishme goditën sot pasdite shumë pjesë të Sllovenisë si dhe pjesën perëndimore të Kroacisë dhe Zagrebin ku raportohet se kryeqendra kroate u përfshi nga një shtrëngatë e fuqishme me breshër.
Këto stuhi vazhduan rrugëtimin në drejtim të jugperëndimit të Hungarisë. Pak më vonë një sistem tjetër i stuhive të fuqishme përfshiu lindjen e Kroacisë, veriun dhe verilindjen e Bosnjë dhe Hercegovinës dhe perëdnimin dhe veriun e Vojvodinës, ndersa në këto momente tek po raportojmë këto sisteme të fuqishme shtrëngatash verore kanë përfshirë Vosjvodinën dhe pjesë të Serbisë veriore dhe veriperëndimore dhe në këto çaste një pjesë e stuhisë do të përfshijë edhe kryeqendrën serbe Beogradin. Stuhitë janë mjaft të fuqishme dhe potencialisht të rrezikshme edhe për jetët njerëzore dhe janë duke kushtëzuar vetëtima dhe bubullima masive erëra të fuqishme dhe breshër. Në këto çaste reshje të dendura shiu ka edhe në bregdetin verior të Kroacisë.
Stuhi jashtëzakonisht të fuqishme dhe shtrëngata me breshër do të zhvillohen edhe nesër në Serbi dhe Bosnjë dhe Hercegovinë si pasojë e depërtimit të një fronti të ri të ftohtë ajror. Vendet tona edhe kësaj radhe po kursehen nga këto turbulenca violente të natyres./Meteoballkan
