Cikloni mjaft i fuqishëm me qendër në Evropen veriperëndimore ka depërtuar me frontet e tij thellë në Evropen qendrore, Alpe dhe Italinë veriore duke formuar ciklonin sekondar Gjenovian.
Në Gjirin e Gjenoves në Itali cikloni sekondar po forcohet dhe po vjen drejt Ballkani duke përfshirë edhe Shqipërinë Kosovë dhe Maqedoninë e Veriut.
Ku priten stuhitë dhe reshjet më të mëdha?
Stuhitë më të fuqishme priten në vet territorin italian e sidomos në veri të Italisë, ndërsa në Alpet evropiane do të fillojnë reshjet e dendura të borës duke dhuruar pamje spektakolare dimërore. Cikloni ka përfshirë edhe Slloveninë me reshje intensive, ndërsa gjatë ditës do të përfshijë Kroacinë, Bosnjën dhe Hercegovinën, Malin e Zi dhe pastaj edhe Shqipërinë, Serbinë, Kosovën dhe Maqedoninë Veriore. Në Kosovë sot nuk priten aq reshje, ose do të jenë reshje sporadike, më të theksuara në Dukagjin, por vonë në mbrëmje ose natën dhe nesër paradite priten reshje dhe rrebeshe, madje nganjëherë të dendura.
Reshje të dendura shiu priten në shumë zona kontinentale të vendeve që i përmendëm më lartë, kurse në Detin Adriatik priten shtrëngata shiu dhe rrebeshe intensive shiu me vetëtima dhe bubullimë.
Cikloni do të rrugëtojë në drejtim të Evropes verilindore përmes Luginës së Panonisë dhe do të jetë mjaft i pasur me lagështi.
Edhe në Shqipëri do të fillojnë reshjet e shiut dhe rrebeshet, vende-vende intensive. Në Kosovë reshje dhe rrebeshe lokale shiu fillimisht priten në disa pjesë të Dukagjinit, pastaj deri në mbrëmje edhe në viset tjera të Republikës së Kosovës. Reshjet më intensive dhe më të përhapura parashihen gjatë natës dhe mëngjesin ose paraditen e së shtunës ku në shumë vise të territoreve tona do të ketë edhe rrebeshe lokalisht intensive me vetëtima dhe bubullimë.
Të shtunën vonë do të kemi depërtimin edhe të frontit të ftohtë atmosferik që do të kushtëzojë ulje të temperaturave dhe reshje bore në viset më të larta malore, ndërsa të dielën një valë e re reshjesh përfshinë Shqipërinë, Maqedoninë Veriore dhe disa pjesë të Kosovës si dhe Luginën e Preshevës.
Këto masa mjaft jo-stabile ajrore do të kushtëzojnë reshje të dendura bore në shumë rajone Alpine Evropiane ku priten rreth 30 cm. deri në gjysmë m. reshje të freskëta bore sidomos në Alpet italiane.
Fillimi i javës së re në territoret tona mund të kushtëzojë një përmirësim afatshkurtër të kushteve të motit, por kjo mbetet të analizohet në shkrimet tjera./MeteoBallkan
