Vazhdojmë të mbesim nën ndikimin e masave mjaft të ngrohta ajrore për këtë periudhë kohore si rrjedhojë e rrymimeve të fuqishme ajrore nga jugu, gjegjësisht nga Mesdheu dhe Afrika Veriore. Ajri i ftohtë polar ka depërtuar tani deri në Kroaci ku ka reshje të dendura bore vende-vende. Reshje intensive shiu ka në Dalmaci të Kroacisë, Bosnjë dhe Hercegovinë dhe Mal të Zi. Reshjet e dendura të borës do të shtrihen edhe në Bosnjë dhe Hercegovinë dhe Mal të Zi.
Reshje shiu dhe erëra ka edhe në Shqipëri ku pritet intensifikim i tyre. Po ashtu edhe në Kosovë priten gjatë natës. Në disa rajone veç kanë filluar. Gjatë orëve të ardhshme pritet intensifikim i reshjeve të shiut dhe erërave jugore.
Nesër do të kemi ulje të lehta të temperaturave edhe në Kosovë dhe reshje lokale shiu e bore. Vende-vende reshje intensive. Ka shumë gjasa që njëkohësisht në disa rajone të ketë reshje të dendura shiu, ndërsa në disa rajone tjera reshje të dendura bore. Në fund reshje bore në tërë shumicën e territorit të Kosovës (Të Martën).
Temperaturat nga e marta do të shënojnë ulje të ndjeshme, ndërsa afër fundit të javës ngritje të ndjeshme përsëri.
Pra, vazhdon mot jashtëzakonisht dinamik dhe i ndryshueshëm./Meteoballkan
