Cikloni i cili na solli erërat e fuqishme dhe temperaturat polare tani është larg territoreve tona dhe në vend të tij në rajon po depërtojnë masa të thata anticiklonike, por masat e ftohta polare do jenë prezente disa ditë. Netët dhe mëngjeset e ardhshme do të jenë mjaft të ftohta dhe me acar, kurse temperaturat ditore do të shënojnë ngritje të lehta.
Temperaturat më të ulëta nëpër ultësira pritet të sillën nga -2 deri në -8 gradë Celsius, kurse në viset kodrinore malore ato mund të ulen deri në -13 ose -14 gradë Celsius. Nga e diela dhe e hëna temperaturat do të shënojnë ngritje të ndjeshme si në vlerat minimale po ashtu edhe në ato maksimale.
Ishte ky cikloni i parë “serioz” dhe i fuqishëm i kësaj sezone dimërore. Cikloni solli erëra deri në 100-120 km-h në disa rajone Kosovë si dhe reshje të dendura bore veçanërisht në viset kodrinore-malore, ndërsa më gjerësisht në Ballkan (Kroaci dhe Bosnjë dhe Hercegovinë) cikloni solli erëra uraganike deri në 200-220 km në orë me pasoja të mëdha materiale./Meteoballkan
