Gjatë kësaj jave na pret mot i ndryshueshëm si në aspektin termodinamik po ashtu edhe në dimensionin e presionit atmosferik.
Java fillon mjaft e ngrohtë ashtu siç po e shohim, me rreze të shumta diellore dhe erëra kryesisht të lehta juglindore. Mot mjaft i ngrohtë dhe stabil pritet gjatë dy ditëve të para të javës, pra sot (e Hënë) dhe nesër (e Martë). Temperaturat maksimale në nivel rajonal pritet të arrijnë deri në 26, – 28 gradë Celsius, ndërsa në disa vise mesdhetare në Shqipëri edhe deri në 30 gradë Celsius.
E mërkura sjellë destabiliizim dhe freskim të motit për shkak të uljes së presionit atmosferik, gjegjësisht depërtimit të një mase ajrore jo – stabile-ciklonike nga veriperëndimi i Kontinentit. Priten ulje të temperaturave, erëra herë pas here të fuqishme nga jugperëndimi dhe shtim i vranësirave. Megjithatë nuk priten reshje të mëdha dhe po ashtu reshjet nuk do të jenë gjithëpërfshirëse, pasiqë kemi të bëjmë me shira të izoluar veror.
Mot i paqëndrueshëm pritet edhe të enjtën, me vranësira, intervale kohore me diell dhe në disa vise edhe rrebeshe lokale shiu me vetëtima dhe bubullimë. Në shumë rajone nuk priten fare reshje.
Të premtën po ashtu mot me intervale të gjata kohore me diell, vranësira dhe rrallë në ndonjë rajon mund të ketë ndonjë rigë ose rrebesh afatshkurtër shiu.
Për fundjavë sipas të gjitha gjasave pritet destabilizim i mëtutjeshëm i motit. Përpos intervaleve kohore me diell mund të kemi zhvillime të fuqishme të vranësirave të cilat herë pas here pritet të kushtëzojnë reshje shiu dhe rrebeshe lokalisht të fuqishme shiu me vetëtima dhe bubullimë kryesisht pasditeve dhe mbrëmjeve.
Pra, dy ditët e para të javës mjaft të ngrohta. Nga e mërkura freskim i motit, me reshje lokale, por jo të mëdha dhe jo gjithëpërfshirëse. Gjatë mesjavës dhe fundjavës moti mbetet më i freskët krahasuar me fillim-javën. Për fundjavë mundësi për reshje shiu dhe rrebeshe me vetëtima dhe bubullimë. Reshjet që mund të na vijnë për fundjavë do të jenë mjaft të mirëseardhura sepse ka shumë ditë pa asnjë pikë shiu dhe thatësia ka filluar të shfaqet menjëherë.
Parashikimet më të detajuara mund ti gjeni në postimet tona përditshme./Meteoballkan