Muaji i kaluar ishte tetori më i ngrohtë i regjistruar ndonjëherë në Evropë.
Kështu ka njoftuar të martën Shërbimi i Ndryshimeve Klimatike (C3S) Copernicus, pas një vere të shënuar me temperatura rekord. Kontinenti evropian është ai që ngrohet më shpejt në Tokë.
Temperaturat mesatare ishin “pothuajse 2 gradë Celsius mbi periudhën e referencës 1991-2020”, tha Copernicus në një deklaratë.
Shërbimi evropian, i cili nuk ka të dhëna të krahasueshme para periudhës 1991-2020, kishte njoftuar tashmë se vera e vitit 2022 ishte më e ngrohta e regjistruar ndonjëherë.
“Pasojat serioze të ndryshimeve klimatike janë tashmë të qarta dhe ne kemi nevojë për veprime ambicioze klimatike në COP27 në mënyrë që të stabilizohen temperaturat afër objektivit 1.5 gradë të vendosur nga Marrëveshja e Parisit”,tha Samantha Burgess.
Sipas shërbimit evropian, “një valë të nxehti çoi në temperatura rekord ditore në Evropën Perëndimore dhe një tetor rekord për Austrinë, Zvicrën dhe Francën, si dhe pjesën më të madhe të Italisë dhe Spanjës”.
Kontinenti evropian është ai që ngroh më shpejt në Tokë, thanë ambientalistët.
Gjatë 30 viteve të fundit, Evropa ka parë një rritje të temperaturës më shumë se dyfishin e mesatares globale, duke u ngrohur me rreth 0,5 gradë Celsius në dekadë.
Në tetor, në disa pjesë të kontinentit, ky mot anormalisht i ngrohtë u kombinua, si gjatë verës, me një mungesë reshjesh.
