Masa pak më të ftohta ajrore po kalojnë nëpër territoret tona pas shumë ditëve dhe netëve mjaft të ngrohta për këtë periudhë kohore. Këto masa ajrore do të kushtëzojnë uljen e temperaturave dhe rikthimin e acarit të orëve të hershme të mëngjesit, por pa acar të fortë dhe pa ndonjë skenar dimëror.
Ky Shkurt po i tejkalon edhe parashikimet më pesimiste për reshjet e borës dhe mund të llogaritet si një ndër Shkurtet më të thata të kohëve të fundit sidomos kur kemi para sysh reshjet e borës. Modelet në parashikimet e tyre afatgjata lajmëronin për një Shkurt të ftohtë dhe me më shumë reshje bore, por të gjitha këto parashikime të modeleve dolën tërësisht huq dhe për këtë arsye ne nuk po merremi fare me parashikime afatgjata apo shumë rrallë.
Sidoqoftë, përderisa në viset tona temperaturat po ulen në Gadishullin Iberik kemi një rritje rapide të temperaturave pë shkak të një kreshte termike nga Afrika Veriore në drejtim të Iberisë dhe Evropës.
Shumë shpejt temperaturat do të rriten edhe në shumë vise tjera të Evropës perëndimore e qendrore dhe nga e Premtja edhe në Ballkan. Do të jetë ngrohtë sidomos të shtunën me temperatura në Kosovë mbi 15 gradë Ceslius. Kur kemi në Kosovë këto temperatura, paramendoni në Shqipërinë Mesdhetare!
Në diten e dytë të fundjavës do të kemi edhe një front të dobët të ftohtë ajror, por pa kurrfarë gjasash për ndonjë inkursion dimëror. Temperaturat do të pësojnë ulje të lehta dhe do të vazhdojë gjendja pothuajse e njëjtë monotone meteorolologjike. Disa gjasa për ndonjë “goditje dimërore” tek në fund të Shkurtit./MeteoBallkan
