Cikloni i cili na solli sot reshje të dendura atmosferike qendra e të cilit është stacionuar nga jugu i Italisë deri në brigjet e Shqipërisë, do të vazhdojë edhe gjatë natës së sontme të gjenerojë reshje atmosferike në drejtim të rajonit tonë. Reshjet do të jenë të intensitetit të ndryshëm. Nesër pritet që qendra ciklonike të zhvendoset nga brigjet e Shqipërisë në drejtim të Maqedonisë dhe pastaj në drejtim të Evropës Lindore.
Si pasojë do të vazhdojnë apo do të rifillojnë reshjet e dendura të shiut në bregdet dhe borës në viset tjera, sepse qendra ciklonike do të tërheq lagështinë mesdhetare në drejtim të rajonit tonë. Pra nesër në Kosovë priten reshje të reja të dendura bore të cilat do të shoqërohen edhe me erëra mesatare veriore. Reshje të dendura bore do të ketë edhe në Maqedoni dhe në shumë pjesë të territorit të Shqipërisë me përjashtim të atyre rajoneve ku temperatura e lartë do të kushtëzojë reshje shiu. Temperaturat do të shënojnë ulje të lehta si pasojë e erërave të ftohta veriore.
Nga e Premta do të kemi zvogëlimin e dukshëm të intensitetit të reshjeve atmosferike dhe në shumë rajone edhe ndërprerjën e tyre. Pra, të premtën pritet të mbajë mot i vranët vende-vende me reshje kryesisht të dobëta bore. Fundjava do të jetë kryesisht e thatë dhe e vranët, kurse reshje të reja bore priten ditën e hënë por intensiteti i tyre nuk pritet të jetë i madh sikur sot dhe nesër./Meteoballkan.
