Edhe pse gati dy ditë kemi reshje gati të pandërprera dhe shumë rajone po përballën me vërshime gjendja nuk është aspak optimiste. Parashikimet nuk janë shumë të mira.
Sipas ecurive aktuale sinoptike reshjet do të vazhdojnë gjatë ditës së sotme në formë shiu. Në orët e mbrëmjes në Kosovë do të shndërrohen në reshje bore por nuk do të zgjasin shumë. Reshje të reja bore do të rifillojnë nesër pasdite vonë në Kosovë dhe kësaj radhe do të jenë të dendura dhe do të krijojnë shtresa në gati shumicën e territorit të Republikës së Kosovës, megjithatë problematike parashihet fillimi i javës tjetër ku parashihen ngritje e përkohshme të temperaturave, vende-vende përzierja e borës me shi me reshje intensive, duke shtuar këtu edhe faktin e shkrirjes së borës në disa rajone dhe kjo mund të qoj në përmbytje edhe më të mëdha.
Pra, fundjava na sjell herë pas here reshje të dendura bore në Kosovë në shumicën e territorit të Republikës, ndërsa në ultësirat e Maqedonisë së Veriut dhe Shqipërisë priten vetëm reshje shiu.
Edhe njëherë te theksojmë se kushtet atmosferike ditëve të ardhshme do të jenë jashtëzakonisht të papërshtatshme dhe rekomandohet kujdes nga qytetarët sidomos në komunikacion, ndërsa për organet shtetërore rekomandohet që të jenë në gjendje gatishmërie./Meteoballkan
